غيضي کي أفسأنه-أنˇ دۊرۊن دره
غيضي کي أفسأنه-أنˇ دۊرۊن دره
برؤنؤ بتلهأيم
فأرسي وأگردأن: شقأيق قندٚهأري
گيلکي وگردأن: نيمأ رهبر
غيض, جغلأن ؤ زأکأنˇ کيتأبˇ دۊرۊن, تأريخي سأبقه دأره. أ مؤضۊ, قرنˇ نۊزدهؤمˇ آخر آخرأن ؤ قرنˇ بيستۊمˇ أول أولأن, دأب بؤبؤسته. اۊ مؤقه کأرشنأسأن ؤ صأحيب نظرأن گؤفتيدي کي, عأمييأنه نقلأن ؤ أفسأنه-أنˇ غيض خأيلي زييأده. اۊشأنˇ قؤلي أجۊر چي-يأن زأکأنˇ غيضأ پئر ؤ مأرأنˇ جأ زييأدأ کۊنيدي يؤ ؤ أ احسأسأنأ بأل زئن بأعيث به کي جغلأنˇ دۊرۊن احسأسˇ بدي به وۊجۊد بأيه. أممأ حئيقت, أول-نفر «برؤنؤ بتلهأيم» –اۊتريشˇ پيلدأنه روأنشنأس- بۊ کي ايتأ کيتأبˇ دۊرۊن به ايسمˇ «کاربردهاى افسونˇ» دۊرۊن, ايجۊر دئه مسئله-يأ فأندرسته ؤ اۊنأ وأشکأفته.
اۊ وختˇ پسي کي جغلأنˇ روأنشنأسي ؤ روأنکأوي تأزه وأرسي-يأن نيشأن بدأ کي ايتأ جغله ذهن ؤ اۊنˇ تخيؤلˇ دۊرۊن چنقدر غيض دره, نأ آرأم ايسه ؤ منفي يؤ حتتأ مضرته, أفسأنه-أن ؤ عأمييأنه نقلأنأ بدجۊر بۊکؤبستيدي. مثن ايتأ جغله چۊتؤ خۊ پئر ؤ مأرأ تۊقأيه, هۊتؤيم تأنه بعضي-تأ مؤقه-أن اۊشأنˇ جأ اۊنأ مرأغأ گيره.
پس شأ گؤفتن, أفسأنه-أن, جغله رۊحي يؤ روأني زيويشأ نظأره شه. حئيقت أنˇ کي أگه جغله أ نقلأنˇ مرأ آشنأ ببه ؤ أشأنأ بخأنه, اۊنˇ رۊح ؤ روأنˇ سر مأله نهه. هأنˇ وأسي, بعضي-يأن بأور دأريدي کي أجۊر نقلأن, جغلأنˇ نأخۊشي احسأسأني کي پۊر درد ؤ رنج ايسيدأ فيت ديهيدي.
اۊشأني کي ونأشتيد جغلأن قديمي يؤ سۊنتي نقلأنأ وأخأنيدي, آخربسره به أ نتيجه فأرسيدي کي حتتأ أگه جغلأنˇ تأزه دأستأنأنˇ دۊرۊن, خييألي شخصييتأن, ديو ؤ يۊهأ مأنستن دبه, اۊ شخصييت حؤکمن وأ مئروأن ؤ دۊس-دأشتني ببه. أممأ حئيقت أنˇ کي أشأن, ايتأ مۊهيم ؤ أسأسي نؤکته-يأ جخترأ دأييد؛ يۊهأ ؤ ديوي کي زأکأن ايوأر ايوأر اۊنأ خۊشأنˇ دۊرۊن حس کۊنيدي يؤ همه-کسˇ جأ پيشتر اۊنˇ مرأ سر ؤ کأر دأريدي, هۊ ديوي ايسه کي اۊشأنˇ دۊرۊنأ کرأ خۊره؛ چۊنکي زأکأن, گأگلف خۊشأنأ وختي کي ايتأ احسأسˇ نأخۊشأيند دأريدي ايتأ وحشتنأکˇ غۊل دينيدي کي همه-کسˇ جأ ويشتر اۊشأنأ أذئت کۊنه.
أسأ, أگه أ يؤهأ, اۊنˇ نأخۊدآگأ دۊرۊن جۊخۊسه ؤ بيرۊن نأيه, جغله نتأنه اۊنأ بشنأسه ؤ هيچ مؤقه نتأنه اۊنˇ مرأ آشنأ ببه. أممأ أگه جغله, أفسأنه-أن ؤ اۊشأنˇ فأنتزي يؤ خييألي کۊگأ مرأ آشنأ ببه, اۊنˇ ذهن ؤ تخيؤلˇ قؤدرت وأج أيه ؤ تأنه اۊنأ خۊ مرأ ايجأنأ بۊکۊنه. جغله أگه أجۊر أفسأنه-أن ؤ نقلأنأ نخأنه ؤ وأگۊيأ نۊکۊنه, نتأنه خۊ خييألي يۊهأيأ بشنأسه ؤ رأيي کي بتأنه اۊنأ سر ببه-يأ نييأفه.
أجۊر مؤقه-أن, جغله اضطرأب ؤ نيگرأني زييأدأ به ؤ گير دکفه. قديمي ؤ عأمييأنه أفسأنه-أنˇ ايشنأختن, اۊنˇ ذهنˇ اضطرأب ؤ نيگرأني-يأ ايتأ خؤرم قألب ؤ فؤرم دهه ؤ آخربسره, أ ديوأ چۊتؤ سر بؤستنأ, اۊنه آشکأرأ کۊنه. اۊشأني کي کؤللن ونأليدي زأکأن قديمي أفسأنه-أن ؤ نقلأنأ بخأنيد, ايدعأ کۊنيدي کي أگه أفسأنه-يي غۊلأن ؤ ديوأنأ جيگأ بدد, جغله نأخۊدآگأ, تأنه اۊنˇ ذهن ؤ عقلأ طبيعي وأج بأوره ؤ بيلکؤل, أجۊر چي-يأن أگه بئسيد, ونأليدي زأکˇ ذهن دۊرۊس وأج بأيه.
أ آدمأنˇ نظر أنˇ کي, عقلأني «من» وأسي هۊ جغلگي زمأت پيله-أ به! هأنˇ وأسي, نوأسي جغله «نهأدˇ» جۊخۊفته چۊمأرأن, بيدأرأ به. پس, وأسي هۊ أول-سر ونأليم جغله خۊ نأخۊدآگأ جأ وأخبأ به ؤ نقلأني کي اۊنˇ نأخۊدآگأيأ وأخبدأرأ کۊنيدي-يأ اۊنˇ جأ جيگيريم.
شأ أتؤ گؤفتن کي جغله وأ خۊ بدگيل ؤ هأچينه خييألأنأ سرفۊکؤ بزنه ؤ خألي خؤرم خييألأنˇ جأ کئف بۊکۊنه. أممأ حئيقت أنˇ کي نظرأني کي «نهأدأ» سرفۊکؤ زنيدي, عملˇ دۊرۊن بقأيده بکأرخؤر ني-ييدي. اۊ وخت کي جغله مجبۊرأ به خۊ نأخۊدآگأ ضميرأ سرفۊکؤ بزنه چي ايتفأقي دکفه؟
أ نۊمۊنه-يأ فأندريد:
پسر زأکي کي خۊ درمأنˇ دؤره-يأ تۊمأنأ کۊده پس, کي خأيلي-يم طۊلˇ درأزه دأشتي, يؤکؤ دۊکۊشسته بۊ, أنˇ دليلأ أتؤ وأگۊيأ بۊکۊده:
«چۊنکي نأمؤخته-گبأن بزه بۊم, مي مأر مي دهنأ صأبۊنˇ مرأ بۊشؤسته. من قۊبۊل دأرم کي مي گبأن نأمؤخته-گب بۊ, أممأ اۊن نأنستي کي اۊ وأژه-أنˇ شؤستنˇ مرأ, خؤرم گبأن ؤ خؤرم کلمه-أنم فۊشؤرده».
يني, نأخۊدآگأ ضمير, بۊنيأدي يؤ خأمˇ موأدˇ چۊمأره, کي اۊنˇ سر, «من», أمي شخصييتأ ديچين وأچين کۊنه. چۊنکي, أفسأنه-أن هۊ طبيعي منبعأن ؤ ذخيره-أني ايسيدي کي أ موأدأ تأمين کۊنيدي يؤ اۊنأ سر ؤ شکل ديهيدي ؤ آخربسره, اۊ وظيفه-أني کي «من» اۊشأنˇ مرأ شخصييتأ چأکۊنه سر, مأله نيهيدي. أگه أ طبيعي منبع-يأ أمي جأ جيگيرد, أمي زيويش لأتوأرأ به ؤ دئه تخيؤل ؤ رؤيأيي نمأنه کي أمرأ «نأجه» بدنه.
پس, أمي زۊر فأنرسه کي بتأنيم زيويشˇ مۊشکيلأن ؤ اۊنˇ جير ؤ جؤرأنˇ مرأ کله به کله بيبيم. أ خييألي ؤ رؤيأيي کؤگأ وأج أوردن ؤ آمؤجئنˇ مؤقه, هۊ جغلگي زمأته. أنم بيگيم کي أمأن أمي زأکأنˇ خييألي يؤ فأنتزي کؤگأيأ چن جۊر ديگرم تأنيم وأج بأوريم ؤ حتتأ اۊشأنأ فيت بديم کي أ خييألي يؤ أفسأنه-يي کؤگأ لبله-يأ بيگيرد. ايتأ أ رأئأن, أنˇ کي زأکأنأ فيت بديم «نقأشي» بکشد! أمأن أمي زأکأنأ گيمي هرچقد دۊس دأريدي تأنيد نقأشي بۊکۊنيد ؤ حتتأ «دأستأن» چأکۊنيد.
أممأ وختي کي زأکأن أمي خييألي کؤگأ مۊشترکˇ ميرأثˇ (عأمييأنه أفسأنه-أن ؤ نقلأن) مرأ شنأس ني-ييدي, أگه زيويشˇ مۊشکيلأنˇ دۊرۊن گير دکفيد نتأنيد دأستأني خلق بۊکۊنيد کي اۊشأنأ کۊمک بۊکۊنه. أ تألأن تألأني دۊرۊن, جغله, خألي تأنه نقلأني بگه کي اۊنˇ نيگرأني يؤ نأجه-أنأ ربط دأره.
هرچن کي روأن-مجأن, نأخۊدآگأ ضميرˇ جأ –بۊخۊصۊص زأکأنˇ نأخۊدآگأ ضميرˇ جأ- خأيلي چيزأن آشکأرأ کۊديد, بعضي-يأن هأني أفسأنه-أنˇ نخأندنˇ ره دليل أوريدي. اۊ وخت کي دئه کسي نتأنسته جغله جۊلفˇ کشمکشأنأ, يأ اۊ نيگرأني-يأن ؤ غيضي کي اۊنˇ خأسته-أنˇ دۊرۊن دۊبۊيأ جيگأ بده, أ آدمأن أتؤ نتيجه بيگيفتدي کي:
«أنˇ وأسي کي أ بچک وأچکˇ دۊرۊن جغله خأيلي چيزأنˇ جأ ترسه, وأسي اۊنأ هرچي کي ترسنأک به نظر أيه جأ, دۊرأ کۊدن».
اۊ جغله-يي کي أفسأنه-أنأ شنأسه ره, مأمۊلي نقلأني کي ترسنأک به نظر أييدي, أشأنˇ ترسنأکي ايپچه ايپچه کأسأ به. بزين نأرأحتي يؤ نيگرأني-يي کي اۊ أول-سر, نقلˇ ول بيگيفته فضأ جأ به وۊجۊد بأمؤ بۊ, آرأمش ؤ رضأ مرأ عوض-دکشأ به. چۊنکي جغله تأنه بأزي-يي کي أفسأنه خأندنˇ جأ بأمؤخته مرأ, عأقيلأنه ؤ مۊنأسب, دأستأنˇ مۊشکيلˇ مرأ کنأر بأيه.
پئر ؤ مأرأني کي خۊشأنˇ زأکأنˇ ترسنأکˇ فيکرأن ؤ تۊندي-يأ جيگأ ديهيدي, اعتقأد دأريدي کي أشأنˇ جغله هيچ جۊره نوأ أ فضأئأن ؤ فيکرأنأ درگيرأ به (بخألي همچين چيزي ايمکأن دأره!) وختي کي زأى فأنتزي يؤ أفسأنه-يي نقلأنأ نخأنه, احسأس کۊنه کي اۊن «تنأ» کسي ايسه کي أجۊر نظر ؤ فيکر دأره ؤ هأن, بأعيث به کي اۊنˇ خييألي يؤ ذهني کؤگأ, رأسي رأسي ترسنأکأ به.
أممأ, أگه وأخبأ به کي, ايسأييدي کسأني کي اۊنˇ مأنستن تخيؤلي کؤگأ دأريدي, بأعيث به کي احسأس بۊکۊنه اۊنم أ پيلدأنه کؤگأ ايتأ پرکأله-يه ؤ ترس ؤ سفيأن کۊدني کي خۊ بد ؤ هأچينه فيکرأنˇ جأ دأره, کأسأ به.
أفسأنه-أن ؤ عأمييأنه نقلأن, جغله تخيؤلˇ قؤدرتأ فيت دهه ؤ اۊنأ دۊرۊس وأج أوره. تجرۊبه نيشأن بدأ دأره, زأکأني کي خؤرم تخيؤل دأريدي (چۊنکي أفسأنه-أن ؤ اۊشأنˇ کردˇکأرأنأ بخأنده ؤ بيده دأريدي) فئلمأني کي غيضˇ جأ بتپسته-يه دئنˇ مؤقه, أشأنˇ کردˇکأر عأقيلأنه-تره.
